Racom Maubisse (17/01/2024) Familia Saudozu Venancio Ferras Agradese Ba Estadu Timor-Leste (TL) Liu Husi Komandu Jerál Falentil Forsa Defeza Timor-Leste (F-FDTL) Hili No Hatúr Saudozu Venancio Ramos Amaral Ferraz Hanesan Patrono ba Unidade Polisia Militár (UPM).
Reprejenta Familia Mariano Malik ható lian agradesementu ne’e iha Seremonia Inaugurasaun Monumentu Saudosu nian iha Unidade Polísia Militár Kintal bót Dili, Timor-Leste Kuarta ne’e (17/01)
“Reprejenta familia hamrík iha ne’e atu agradese ita bót sira hotu ne’ebé partisipa iha Seremonia Inaugurasaun Estatua Saudozu Venancio Ferraz Nian. Ami ho fuan no laran nakonnu ho orgullu no kontenti iha ami nia fuan tomak, ható sentimentu profunda ba ami nia Maun, Tiun, Avo, ami nia Primu Komandante Saudozu Venancio Ferraz. Ami Familia ho Mate Restu sira hotu husi Munisípiu Ainaro espesialmente Aldeia Fatumera hakarak ható agradesementu ba Komadu Jeral F-FDTL ne’ebé maka rekoiñese no hili hatúr Komadante Ferras sai Patronu ba UPM hanesan aktu rekoiñesementu bót tebes ba Saudozu nia luta ba Ukun Rasik-An (URA)”
Malik Lori Familia nia naran Agradese mós ba Jenerál Reformadu Lere Anan Timur tamba hola dezisaun hodi disidi harí Monumentu Saudozu Ferras Nian Iha Unidade Polisia Militár, Kuntinua husi Aktual Xefe Estadu Maiór Jenerál Forsa Defeza Timor-Leste (F-FDTL), Tenente Jenerál Domingos Raul “Falur Rate Laek” hodi finaliza nia konstrusaun no Inaugura iha Loron 17 Fulan Janeiru 2024.
“Ható mós ami nia agradesementu ba Jenerál Sesante Komandante Lere Anan Timur ne’ebé maka hola dezisaun hodi inisia ba harí Estatua Saudozu nian iha UPM. Agradese mós ba Komandante Aktual Jenerál Falur Rate Laek ne’ebé maka iha vontade hodi kuntinua ba harí Estatua ne’ebé tó ohin loron ita hotu bele Inaugura. Agradesementu ba Governu liu husi Komandu Jerál F-FDTL ne’ebé maka hili ona Saudozu Ferraz sai hanesan Mahein ba Polisia Militár ne’ebé diriji husi Jenerál Sesante Lere Anan Timur, no kuntinua mós husi Jenerál Aktual Falur Rate Laek hodi konstroi Saudozu nia Estatua”. Tatoli Lian Agradesementu husi Familia Saudozu Venancio Ferraz.
Antes terminia lori familia nia naran ható mós agradese ba Autoridade Lokal Munisípiu Ainaro, Autoridade Komunitaria Suku Ainaro, Konsellu Veteranos Ainaro, Lia Nain inklui entidades relevantes sira nia kontribuisaun to finalizasaun obra ne’e.
“Agradese ba Prezidente Autoridade Munisípiu Ainaro, Administrador Postu Ainaro, Xefe Suku Ainaro, no mós Lia Nain Kultura nian husi Ainaro Tais Metan no Tais Mutin ba kontribuisaun durante prosesu tomak. Agradese mós ba Konsellu Veteranos Munisípiu Ainaro ba kontribuisaun tomak hamutuk ho Familia hodi organiza prosesu tomak tó seremonia ida ne’e. Ami Familia ho Mate Restu sira husi Rai Ainaro no Fatumera hakarak ható agradesementu ba ita bót sira hotu nia prezensa hodi ajisti seremonia Inaugurasaun Saudozu Venancio Ferraz Ninian” Hakotu Reprejentante Familia Saudozu.
Momentu hanesan Liu husi Diskursu Xefe Estadu Maiór Jenerál Forsa Defeza Timor-Leste (F-FDTL), Tenente Jenerál Domingos Raul “Falur Rate Laek” hateten;
“Agradese ba Familia Saudozu Venancio Ferraz nian liu husi ninia reprejentante iha diskrsu ohin hateten mai ita mensajen ne’ebé nakonu ho maturidade, Vizaun, ho Misaun obrigadu barak tamba ita bót Núdár Jerasaun Foun ida fó mensajen ne’ebé tepat ba ita nia konjuntura ida dadaun ne’e. Liu-liu sira ne’ebé mós fó sira nia obra harí Moonumentu ida ne’e sai realidade obrigadu barak ba imi hotu nia partisipasaun.” Antes atu termina Lideransa Númeru 1 Falentil F-FDTL Kongratula Unidade Polisia Militár (UPM) no Familia tomak husi Saudozu Venancio Ferraz ne’ebé partisipa hodi ajisti Seremonia Inaugurasaun ne’e, no komemora Aniversáriu Unidade Polisia Militár ba dala 19.
Alem de Konstrusaun ba obra ne’e hetan aprovasaun husi Jeneral Reformadu Lere Anan Timur iha Loron 22 Dezembru 2021, no tau fatuk dahuluk iha loron 20 Fulan Juñu 2023, Inaugura husi Xefe Estadu Maiór Jenerál Forsa Defeza Timor-Leste (F-FDTL), Tenente Jenerál Domingos Raul “Falur Rate Laek” Loron 17 Fulan Janeiru 2024.
Entertantu Konstrusaun ba Monumentu Saudozu Ferraz nian ne’e ho totál Orsamentu Dolares Rihun Walu, Kontribui husi Membru Unidade Polisia Militár (UPM) kada membru Kontribui Dolar Ha’at Nolu.
Jornalista Moises Magno
Editór Joaquim Coutinho
