Racom Maubisse (22/12/2023) Maske Prepara Ona Foinsa’e Ba Lidera Suku Maibe Povu Nafatin Fó Konfiansa Ba António de Graça Kuntinua Lidera Suku Liurai Ba Periodu 3 Liu Husi Dalan Demokrásia.
Aktua Xefe Suku Liurai Postu Administrativu Maubisse Munisípiu Ainaro António de Graça de Araújo hateten ida ne’e liu husi nia diskursu iha Seremonia agradesementu ne’ebé selebra hamutuk ho Membrus Konsellu do Suku, Autorididade Lokal, Seguransa, no husi Parte Ingeja nian, Inklui Komunidade Suku Liurai Sesta feira ne’e iha Sede Suku Liurai.
“Ba Inan Aman sira hotu no Komunidade husi Aldeia 4 iha Suku Liurai nian maka hau respeita. Atu dehan deit hanesan ne’e hau lori Xefe Suku ba dala tolu ona, iha Tinan 2009 Prmeira Ronde Suku Liurai hau maka lori, Iha Elisaun 2016 Manan mós Premeiru Ronde, Agora dadaun ba 2023 hau maka lori Premeira Ronde Nafatin. Maske hau Prepara ona Joven sira ba iha ne’ebá mais kala Inan Aman sira seidauk fiar maka imi hili nafatin hau, ne’ebé agora dadaun hau asumi knár ida ne’e tó tinan 2030”. Hateten Xefe Aktual Suku Liurai Postu Administrativu Maubisse Munisípiu Ainaro 22/12/2023.
Núne’e mos Lideransa Másimu Suku Liurai ne’e kuntinua husu ba Xefe Aldeia Foun ne’ebé hetan ona konfiansa nia husu atu rona prokupasaun komunidade sira nian, no presija servisu hamutuk ho komunidade sira nune’e bele garante Paz no Estabilidade hodi Kontribui ba Dezemvolvementu iha Suku.
“Saida maka Povu nia hakarak no husu ita bót sira tenki lao tuir, labele lao tuir fali ita bót sira nia hakarak, maibe tenki tuir Povu nia hakarak tamba povu fiar no hili imi ne’e atu lori sira ba naroman, labele lori fali sira ba Nakukun.” Husu António ba Membrus Konsellu Suku ne’ebé hetan Ona Konfiansa husi Povu Suku Liurai Maubisse Munisípiu Ainaro.
Seremonia ida ne’e iha Suku Liurai selebra mós Missa Agradesementu ne’ebé Preside husi Padre Favelino Alves da Costa Akompaña husi Amu Pároko Paroquia Nossa Senhora da Graca Hato-Builiku Padre Francisco Soares Fernandes. No hafoin de Selebrasaun Missa iha Autoridade Lokal, Autoridade Komunitaria no Komunidade Suku Liurai nia oin Amu Pároko Paoroquia Nossa Senhora da Graca Hato-Builiku Pe. Francisco Soares Fernandes hateten, Sai Lideransa atu Serbi Povu, Tamba Povu hili no eskolla ona Lideransa Komunitaria ne’e hatudu Katak Nai Maromak maka hili no Eskola basa Povu Nia Lian ne’e Maromak Nia Lian.
“Sai bot ne’e sai atan, sai bot ne’e atu serbi, Povu nia Lian ne’e Maromak Nia Lian. Ne’e duni Povu hili imi ne’e Maromak maka hili imi, Entaun imi buka atu servisu tuir Jesus Kristu Nia lalaok lideransa ne’ebé sai modelu diak ba Autoridade sira maka Jesus Kristu Nia mai hanesan Salvador Nia mai salva ita, Nia servisu hanesan atan fó Nia-An tó Mate iha Kruz. Mai moris kiak terus atu Nia Povu bele hetan Ksolok no Nia Mate iha Kruz atu Povu bele hetan Salvasaun. Ne’e duni husu ba ita hotu sai Nai Ulun ne’e hodi serbi ema hot-hotu”. Hateten Bibiatan ba Sarani Postu Administrativu Hato-Builiku Munisípiu Ainaro.
Fatin hanesan Administrador Postu Administrativu Maubisse Munisípiu Ainaro ne’ebé Reprejenta husi Adelino Mendonça Espirito Santo Aktual Vise Prezidente Konsellu RKMM iha nia intervensaun hateten, husu lideransa Komunitaria espesial ba Suku Liurai Maubisse atu servisu ho responsabilidade ba Konfiansa ne’ebé hetan ona husi Povu, nia kuntinua husu atu serbi Povu ho fuan.
“Hau husu ba Kolega Re-Eleitu, Xefe Aldeia Foun sira, Delegadu Delegada sira servisu ho responsabilidade. Dala barak ita simu todan ne’e mai husi ita nia Povu tamba saida maka ita bót sira sei halo hau husu para atu bele servi Povu ne’e ho fuan”. Hateten reprejentante Autoridade másimu Postu Administrativu Maubisse iha Suku Liurai Postu Administrativu Maubisse Munisípiu Ainaro.
Entertantu Suku Liurai Kompostu husi Aldeia Hat (4) ho nia total Uma kain 127 (Atus Ida Rua Nolu Resin Hitu) no totál Populasaun 1.006 (Rihun Ida Nen).
NoPartsipa iha Seremonia Agradesementu ne’e Autoridade Lokal no Seguransa Postu Administrativu Maubisse, Amu Pároko Maubisse Reprejenta husi Padre Favelino Alves da Costa, Amu Pároko Hato-Builiku Padre Francisco Soares Fernandes, Komunidade hamutuk ho membrus Konsellu Suku Liurai Postu Administrativu Maubisse Munisípiu Ainaro.
Jornalista Moises Magno
Editór Joaquim Coutinho
