Racom Maubisse, 29/10/2023, Eleisaun Lideranca Komunitariu ne’ebe realiza iha loron 28 fulan Outubro tinan 2023, iha teritorio Timor Laran tomak husi Governu liu husi Ministeriu Administrasaun Estatal ho Comisaun Nasional das Eleisoes, lao homdiak maibe hamosu lakunas lubuk ida mak tuir observasaun husi parte lubuk ida inklui sociedade sivil no media nota katak, eleisaun lideranca komunitariu lao neneik liu no uja Sistema manual (hakerek ho lian) nune’e difikulta eleitores sira atu vota ho lais.

Iha sentru votasaun lubuk ida iha suco Maubisse villa, votantes sira vota liu tiha oras ka regras ne’ebe fo sai husi ESTAE no CNE katak eleisaun sei remata iha tuku tolu loro kraik maibe situasaun mosu oin seluk no votasaun refere balun to’o tiha tuku lima loro kraiak balun to tuku neen loro kraik e balun to kalan.

Depois de rejultadu husi chefe aldeia sira la priense priense 50+1 %, teneke vota fila fali nune’e eleisaun ba chefe  aldeia sira balun to tuku rua madrugada. Situasaun ida ne’e halo komunidade sira preokupa tebes tamba iha sentru votasaun ida ema nain rua to tolu mak halo atendementu ba votantes sira liu husi cek naran no hakerek naran ho lapiseira ka manual.

Maske nune’e eleisaun konsege remata ho diak, tamba hetan kooperasaun diak ho autoridade local husi parte seguransa, CNE ESTAE, hamutuk ho komunidade sira iha kada sentru votasaun.

Rejultadu husi eleisaun lideransa komunitariu iha Posto Administrativo maubisse hatudu katak Chefe Suco Nain hat husi suco sia iha Posto Administrativo maubisse hanesan Chefe Suco maubisse Villa, Chefe Suco Liurai, Chefe suco Edi no Chefe Suco Maulau mak manan kedas iha primeira ronde, no Kandidatu chefe do suco nain lima seluk husi Suco Fatubessi, Manelobas, Manetu, Horaquic, no Suco Aituto hakat ba Segundo ronde.

Relasiona ho eleisaun lideranca komunitariu refere, tuir rejultado ne’ebe hatudu iha Suco Maubisse Villa katak Chefe Suco Maubisse Villa Wilson Nivio Mendonca Re-Eleito ho Votus 1.445 manan kedas iha Primeiro Ronde. Depois de rona tiha rejultadu husi president da meja no orgaun eleitoral, iha intervensaun Chefe do suco Eleito, Wilson Nivio Mendonca hateten katak;

“Husi Rejultado eleisaun ba lideranca komunitariu, liu liu iha Suco Maubisse Villa, hau ata maka manan ho votus 1.445 votus katak liu tiha uitoan 50+1, tamba ne’e iha oportunidade ida ne’e hau hakarak hato’o obrigadu barak ba komunidade husi aldeia sanulu resin rua ne’ebe hamhan-an iha Suco Maubisse Villa, e hau mos hakarak hato’o obrigadu no agradece ba parte hotu liu liu ba seguransa, lia nain, juventude, president da meja, CNE, ESTAE, no parte hotu ne’ebe makfo ona apoiu liu husi imi nia votus konfiansa”.

 

Tamba ne’e chefe do suco re-eleitu Suco maubisse Villa ne’e husu ba parte hotu atu servisu hamutuk ho nia hodi bele dezemvolve suco maubisse villa, nomos cehefe do suco ne’e husu atu kandidatu nain lima seluk ne’ebe mak laliu atu servisu hamutuk ho bele lori Maubisse ba oin, laiha ida mak lakon laiha ida mak manan, ita hotu mak manan ho objektivu ida atu hadia suco ambisse no hadia komunidade nia moris.

Iha Fatin Hanesan Kandidatu Lideranca komunitariu Suco maubisse Villa Adriano M. de Jesusu hato mos ninia intervensaun iha praca de Maubisse ba chefe do suco vensedor no komunidade sira katak;

“ Maske ami lakon ne’e la signifika ami la ko’opera, maibe manan ka lakon ne’e buat normal, mai ita hamutuk ho chefe suco Wilson ba oin hodi hadia ita nia suco, no ami pronto atu koopera”.

Hatutan mos husi Kandidatu cehefe do suco maubisse Villa Alexandre Tilman (Mausoko) katak,

“Maske ami lakon maibe ami nafatin koopera tamba Suco Maubisse iha ita hotu nia liman, mai ita hamutuk ho ita nia chefe do suco eleito hodi hadia ita nia suco hahu husi aldeia”.

Ikus liu mensajem furak mos mai husi kandidatura chefe do suco Maubisse villa Carlos R. da Silva Katak;

“Manan ka lakon mai hotu mak manan, mai ita hamutuk dezemvlve suco Maubisse ba oin”.

Eleisaun primera ronde konaba lideranca komunitariu remata ona, hein tan prosesu tuir mai konaba eleisaun lideranca komunitariu Segundo ronde ba kandidatu lideranca komunitariu sira ne’ebe la liu iha primeira ronde ho 50+1%, ne’ebe sei realiza iha dia 13 de Novembro tinan ida ne’e hodi finalize konaba eleisaun lideranca komunitariu iha tinan 2023, nune’e se mak manan no sira ne’ebe manan on abele kaer ukun to’o tinan 2030.

Povu Timor Leste hein ho esperanca ba lideranca komunitariu sira ne’ebe sei mai hodi bali bo taumatan ba komunidade sira iha suco no aldeia sira ne’ebe iha Timor Leste, hodi luta ba dezemvolvimentu suco no povu nia moris diak.

Jornalista Melania Lemos

Editor Joaquim Coutinho