Racom Maubisse (07/09/2023) Ba Oras ne’e adaun ekipa Tékniku Sekretariadu Tékniku Administrasaun Eleitorál STAE Munisípiu Ainaro hahú husi loron 4 fulan ne’e halao ona atendenementu Resensiamentu Eleitorál no aktualizasaun base de dadus iha Postu Administrativu Maubisse ba Elisaun Suku ne’ebé sei akontese iha loron 28 fulan Otubru tinan ida ne’e.
Ba Radiu Komunidade Maubisse Mau-Loko (RKMM) Operador Sistema Postu Administrativu Maubisse Munisípiu Ainaro Octavianos Tilman liu husi intervista hateten, aktividade Resensiamentu Eleitorál ne’e iha Postu Administrativu Maubisse hahú iha loron 4 fulan setembru ne’e no sei termina iha loron 15 fulan Dezembru tinan ida ne’e. Tamba ne’e husu ba Sidadaun ne’ebé idade atinji ona tinan 16 ba leten bele halo Resensiamentu hodi bele hetan Kartaun Eleitoral, núne’e mós ba Sidadaun sira ne’ebé hadia dadus, Kartaun Tohar, Lakon, Inklui ba Sidadaun ne’ebé hakarak muda hela fain.
“Iha biban ida ne’e hakarak fó hatene ba Komunidade sira hotu iha Postu Administrativu Maubisse, katak ita nia Resensiamentu Eleitorál iha Postu Maubisse ita hahú tia iha dia 4 de Setembru no ita sei remata iha iha dia 15 de Dezembru 2023. Tamba ne’e husu ba Komunidade sira ne’ebé hakarak halo Resensiameentu Eleitorál bele hakat mai iha ita nia Edefisiu Postu Administrativu Maubisse nian tamba agora dadaun ne’e ita hahú ona halo ita nia Resensiamentu Eleitorál iha Postu Administrativu idak-idak nian.” Hateten Octavianos
Kona-ba Rekezitus ne’ebé presija waibhira mai halo Resensiamentu Operador Sistema Postu Administrativu ne’e esplika katak;
“Ne’e duni Rekezitus ne’ebé presija ba sidadaun ne’ebé maka idade atinji ona 16 anos ba leten bele mai tuir Resensiamentu iha Postu Administrativu Maubisse. No mós ita iha aktualizasaun dadus ne’ebé sala, hadia naran, data moris, kartaun lakon, muda hela fatin, Nia Rekezitus maka hanesan ba ne’ebé foun tenki hodi Sertidaun moris RDTL original no Kopia tahan ida, ba sira ne’ebé maka hadia dadus tenki hodi Kartaun original, Sertidaun RDTL original no kopia tahan ida, ka BI no Paseporte. Tuir fali ba ida ne’ebé maka Kartaun lakon presija tenki lori deklarasaun lakon husi PNTL no mós Sertidaun RDTL Originl no Kopia tahan ida. Ba sira ne’ebé maka atu muda hela fatin ka transferensia presija deklarasaun husi suku ne’ebé maka agora dadaun nia muda ba no mós dukumentus hanesan Kartaun Eleitorál ne’ebé nia iha ho RDTL Original no Kopia tahan ida.” Esplika Octavianos Tilman iha Edefisiu Administrasaun Postu Maubisse.
Entertantu hahú husi loron 4 to loron 7 fulan setembru ne’e ekipa STAE ne’ebé destaka iha Administrasaun Postu Maubisse Eleitós hamutuk 23 maka mai halo ona Resensiamentu Kopmpostu husi foun no tuan.
Jornalista Moises Magno
Editór Joaquim Coutinho
