Maubisse (07/09/2023) Kinta feira ne’e Kóperativa COCAMAU Maubisse halao ona pagamentu ba membrus produsaun Kafé hamutuk Grupu 28 iha Aramajen COCAMAU Maubisse, ho totál orsamentu ba Grupu sira ne’ebé maka mensiona dadaun ne’e hamutuk $ 300.000 (Rihun Atus Tolu), ho kuantidade Kafé hamutuk tonelada 110 (Atus Ida Sanolu) oras ne’e dadaun iha Armajen Kóperativa COCAMAU Maubisse.
Ba Radio Komunidade Maubisse Mau-Loko Prezidente Kóperativa COCAMAU Julio Meendonça Martis hateten, orsamentu ba pagamentu ida ne’e mai husi Komprador sira neebé durante halo parseria ho Kóperativa COCAMAU.
“Ohin ida ne’e halo pagamentu ba membrus Kóperativa COCAMAU ne’ebé maka durante ida ne’e lori sira nia Kafé mai tetu iha Kóperativa COCAMAU hetan 110 toneladas no orsamentu ne’ebé maka ohin ida ne’e halo pagamentu ba sira $ 300.000 dolar ne’ebé maka ohin ida ne’e halo pagamentu ba membrus sira Kóperativa COCAMAU nian. Orsamentu sira ne’ebé maka ohin halo pagamentu ne’e mai husi Kompador sira ne’ebé maka durante ida ne’e halo parseria ho COCAMAU liu husi PARCIC ne’ebé maka liga ho komprador sira husi Jepaun.” Dehan Prezidente COCAMAU 07/09/2023.
Lideransa ba Kóperativa COCAMAU ne’e kuntinua hatutan ba tinan ida ne’e kuantidade no kualidade produsaun Kafé menus tamba Klima, laos ida ne’e deit maibe kondisaun Estrada mós susar atu ultrapasa iha tempu idan hodi transporta Káfe ho lais mai iha merkadu.
“Klima ba tinan ida ne’e la fó tempu ba ita nia Komunidade sira atu produs Kafé ho kualidade atu núne’e sira bele hetan rendementu hodi sustenta familia. Ida mós difikildade ba Estrada iha area rurais sira ne’e Estrada at liu tamba Kafé sira produs hela maibe labele asesu ba merkadu, difikuldade seluk tan maka matreal sira ne’ebé maka iha la sufisiente para ita nia membrus sira mós bele produs Káfe ida ne’e ho kualidade diak ho kuantidade as atu komprador sira bele sosa.” Hakotu Prezidente Kóperativa COCAMAU aktul Xefe Suku Edi Postu Administrativu Maubisse Munisípiu Ainaro.
Jornalista Moises Magno
Editór Joaquim Coutinho
