Racom Maubisse Faluk Joana Maia hela iha Postu Administrativo Hato-udu Suku Leolima, Aldeia Lesse, senti triste ho realidade moris nakonu ho dezafius ne’ebe nia hasoru ho oan kiak nain 7, to’o agora seidauk hetan tulun husi Governo.
Iha loron 21 fulan Maiu sai hanesan loron tristeza ne’ebe hafalun faluk Joana ho nia oan nain 7 tenki simu ho realidade hodi husik hela fatin ne’ebe hamahan aan, durante tinan barak nia laran hela hamotuk ho familia sira, maske ho laran triste hamonu matan ween, halerik presiza tulun, maibe ba se no se mak bele hatan.
Ho situasaun moris hanesan ne’e, iha balun hare’e no rona hakat liu deit, maske nune’e sei iha balun ne’ebe ho fuan boot hakbesik hodi rona no haforsa faluk ho oan kiak nain 7 hodi ajuda, harii uma mahon foun iha kintal ne’ebé avo sira husik hela.
Uma ne’ebé hari’i husi joven sira ho voluntáriu ho mediada mais ou menus metru kuadradu 3X4 ne’ebé taka deit ho kalen tahan 20 no didin mos ho kalen, uma ne’e laiha kuartu laiha mos toba fatin inklui mos dapur, iha uma ne’e laiha roman husi eletrisidade, no laiha kama, lona nahe iha rai maka sai hanesan kama ba sira hodi toba inklui mos tur hamotuk hodi han kalan.
Ho moris ne’ebé inan faluk Joana ho oan hasoru, todan tebes ba familia ida ne’e, tamba lakon ona sira nia aman Luis da silva Siquera iha loron 14 fulan Junho 2022.
Nakukun hafalun tebes Joana ho oan kiak nain 7 ne’e tanba lakon ona ema ne’ebé sira hadomi liu, lakon mos uma, e lakon ona Moral, tanba laiha ona aihun mahon ba sira.
Ho nune’e inan faluk Joana Maia hatete laiha ema atu laran diak hodi bele ajuda bebeik, tanba ne’e nia husu Governo atu bele tulun nia, maibe to’o agora sedauk hetan apoiu ruma.
“ Hau triste loos to agora husi parte autoridade sira sedauk mai fo netik apoiu ruma ba ami,hau mos ema nasaun RDTL ida ne’e nia ema, hau faluk ho oan kiak nain 7, ema ne’ebé maka ami laran metin ba laiha ona, agora ami laran metin ba Estadu deit, maibe’e husi parte Estadu nian balu mai vizita ona maibe’e sedauk fo apoiu ruma,” hateten faluk Joana ho laran triste hafalun matawen ba lian orluli iha fatin ne’ebé nia ho ona nain kiak nain 7 horik ba. Kinta (8/06/23)
Chefe Aldeia Lesse, Jusé do Santos ho laran triste haktuir, bainhira faluk ho oan kiak nain 7 ne’e hasoru nia husu tulun halo uma, tanba ne’e nia rekomenda ba Ministériu Solidaridade~~
Sosial no Inklujaun (MSSI), Autoridade Munisipio hodi bele responde emerjensia ba faluk no oan kiak nain 7, maske daudaun ne’e chefe Aldeia mobiliza ona jovem sira halo baraka provizóriu.
“Hanesan autoridade hau mos senti triste ba situasaun ne’ebe durante inan faluk no oan kiak nain 7 ne’e emfrenta, tamba ne’e hau mobiliza ona jovem balun hodi harii uma baraka kiik ida ne’e nune’e mahon netik ba inan faluk no oan sira maske ho metru kudradu 3X4 no duku deit ho kalen tahan 20, situasaun sira hanesan ne’e senti triste tebes, hanesan autoridade lokal no reprezenta mos komunidade iha aldeia ida ne’e sujere ba Governu, presiza tau atensaun hodi apoiu netik komunidade sira nia susar. liuliu ba Ministèriu Solidariedade Sosial atu iha tempu badak nia laran tau matan no apoiu netik ita nia inan faluk Joana ho oan sira ne’ebe agora dadaun hala’o hela Estudu balun iha banku sekundàriu no balun iha Ensinu bàziku,”xefe aldeia Lesse José rekomenda
Enkuantu inan ,faluk Juana Maia ho nia kaben matebian Luis da Silva Siquera hahoris oan nain 7, feto 6 no mane 1.
Oras ne’e dadaun Inan faluk ho oan nain 7 ne’e hetan ona apoiu balun husi Brigada Ran kadalak, kalen tahan ha’at nulu no fo’os inklui nesesidade seluk ne’ebe ajuda mos husi vijinhu sira.
To agora faluk ho ona kiak nain 7 noe’e , esperansa boot hodi hein tulun husi Governo.
Jornalista Moises Magno
Editór Joaquim Coutinho
