MAE: Planu Forma Postu Administrativu Foun Iha Maubisse Sei Intrega Ba Governu Foun

0
47 views

Ainaro (29/05/2023) Informasaun ne’e ható husi Ministru Administrasaun Estatal (MAE) Miguel Pereira de Carvalho, relasiona ho proposta ne’ebé maka ható ona husi Komunidade Suku 4 iha Maubisse ho objetivu Forma Postu Administrativu foun ida tan iha Maubisse Munisípiu Ainaro.

Miguel Pereira de Carvalho hateten ida ne’e ba Jornalista RKMM iha Reuniaun Konsellu Kórdenasaun Teritótial ho Prezidente Autoridade Munisípiu, no Administrador Munisípiu husi teritoriu Nasional iha Salaun Administrasaun Munisípiu Ainaro Segunda ne’e (29/05).

“Komunidade sira, reprejentante sira husi Suku 4 iha Maubisse nian ható ona Proposta Ministériu mós halao ona levantementu de dadus ba iha area 4 ne’e. Agora dadus tékniku sira ne’e sai hanesan nota ida ke hau sei entrega ba iha Ministru foun para ke bele halo análiza sira, bele halo konsiderasaun sira tamba kaju nesesaria importante atu bele foti dezisaun sira tuir mai.

Purque ita nia Statutu Stitulár Orgaun Soberanu sira hateten dehan katak, depois de elisaun Jeral sira membru Governu sira ne’ebé maka iha hela funsaun labele foti dezisaun ne’ebé fó impaktu ba Governasaun sira tuir mai”. Hateten Governante ne’e 29/05/2023.

Ministru Kuntinua klarifika liu tan katak, téknikamente ekipa husi Ministériu Administrasaun Estatal (MAE) halao ona levantamentu dadus ne’ebé sei aprejenta ba Membru Governu foun ne’ebé tutela ba iha Servisu MAE nian.

“Téknikamente MAE nia estáf sira halao hela levantamentu de dadus ofisilamete sira sei aprejenta ba iha membru Governu foun ne’ebé maka sei mai Ministra ka Ministru Administrasaun Estatal (MAE).” Hakotu Governante ne’e.

Alem de tuir dadus ne’ebé maka iha katak, Suku 4 refere Priense kritéria forma postu Administrativu ida, maibe presija tan levantamentu dadus audisionais balun hanesan Topografia, Jeográfia, no seluk tan.

Fatin hanesan Administrador Postu Administrativu Maubisse Munisípiu Ainaro, Claudino Mendonça relata Suku 4 ne’ebé fornese ona Proposta ba Forma Postu foun maka hanesan Suku Manetu, Manelobas, Edi, no Suku Maulau.

“Iha Postu Administrativu Maubisse Komunidade husi Suku 4 halo ona Proposta ba Ministru Administrasaun Estatal (MAE) hodi estabelese tan Postu Administrativu ida ne’ebé maka ho naran Postu Administrativu Dom Martins. No Suku 4 ne’ebé maka hakarak harí Postu foun ne’e maka Suku Edi, Manetu, Manelobas, no Suku Maulau ho totál Populasaun 8.000 ital.” Tenik Administrador Postu Maubisse.

Claudino Mendonça hateten tuir dadus ne’ebé maka rekolla ona husi Ekipa Tékniku MAE hatudu katak Suku 4 refere priense ona kritiria hodi forma tan Postu foun ida iha Maubisse Munisípiu Ainaro.

Entertantu dadaun ne’e Postu Administrativu Maubisse Kompostu husi Suku 9 Aldeia 62 ho nia totál Populasaun 31.000 ital tuir dadus Semsus Populasaun tinan 2022 nian.

Jornalista Moises Magno

Editór Joaquim Coutinho

0 0 votes
Article Rating
Subscribe
Notify of
guest
0 Comments
Inline Feedbacks
View all comments