Racom Maubisse (20/04/2023) Partidu Assosiasaun Populár Monarquia Timorense (APMT) Kinta feira ne’e halao Kampaña ba loron da ruak nian ho tipu Tama sai Uma no husi ema ba iha Suku Maubisse Villa Postu Administrativu Maubisse Munisípiu Ainaro.
Liu husi Surumutuk ne’ebe maka halao ho militantes no Estruktura Partidu APMT iha Area Samkada Suku Maubisse Prezidente Partidu Pedro da Costa Ramalho hateten APMT manan no liu bareira iha Elisaun Parlamentar loron 21 fulan Maiu 2023 maka Timor-Leste Sei iha Mákina rasik hodi Produs Moeda (Osan) Timor Nian.
“Se manan iha Elisaun Parlamentar maka hau nia Povu tenki hadia uma hadia fatin atu tau ba osan ne’e, tamba osan ne’e nia hun maka iha Timor ne’e mais ita la hatene ida. Tan ne’e husik Povu maka disidi se karik APMT manan iha Parlamentu ida ne’e anta prontu hau haruka ema nain rua troka hau nia fatin iha ne’e, hau ba Portugal lori Mákina mai halo osan iha ne’e” Dehan Prezidente Partidu Assosiasaun Popular Monarquia Timorense Iha Maubisse 20/04/2023
Tempu hanesan Segundu Vise Prezidente Partidu Assosiasaun Popular Monarquia Timorense Cécar Agostu reafirma liu tan katak, Maubisse iha Potensia bót ba Seitor Tuirizmu, Agrikultura, no Kultura tamba ne’e atu Dezemvolve ho diak maka Timor Leste Tenki introdus nia osan rasik.
“Kuandu Povu Timor fó konfiansa ba APMT liu bareira programa prioridade ne’ebe ami sei halo premeiru lugar maka Dezemvolve uluk husi Uma Lisan sira katak ita hadia uluk ita nia Knua programa prioridade númeru 1 maka ida ne’e. Segundu programa maka hanesan ohin Prezidente temi ona katak, programa prioridade ida maka Osan, terseiru kona-ba Turizmu no Agrukultura ita lori osan maka halo buat sira ne’e ita haré ba Osan kuandu Osan laiha ita lori saida maka halo buat sira ne’e, tamba ne’e maka programa primeiru no Segundu nian ne’e maka bele disidi hanesan ohin Prezidente dehan ona ba imi rona”. Dehan Cécar Agosto.
Tamba ne’e ba Militantes no Simpatizantes Partidu Assosiasaun Popular Monarquia Timorense (APMT) iha Postu Administrativu Maubisse, Segudu Vise Prezidente Partidu APMT kuntinua husu;
“Espesial ba Povu Maubisse se senti katak Programa Monarquia ka APMT nian ne’e maka diak liu maka dia 21 de Maio hili ho konsensia ba númeru ida ikus liu maka númeru 17” Nia Hakotu.
Entertantu Aktividade Kampaña APMT ba loron da ruak nian ne’e iha Maubisse lao diak tó remata tamba hetan Seguransa másimu husi PNTL Esquadra Maubisse no hetan Supervisaun husi Ofisial Supervisaun Eleitoral CNE Postu Administrativu Maubisse Munisípiu Ainaro.
Jornalista Moises da Silva Magno
Editór Joaquim de Fátima Coutinho
