Racom Maubisse, 17/04/2023, Hakat husi sikun ida ba sikun seluk hanesan ema humanu ita la espera, basa moris ne’e mai ita hanesan misteriu.

Relasiona ho moris no mate ne’ebe ita la espera, iha dia 17 de Abril 2023, maisomenus oras tuku hat dadersan autor inicial SR, ne’ebe hanesan bainaka, husi nia knua Hatobuilico mai Nunumogue ho objektivu atu ba tarata nia kartaun eleitoral iha STAE Municipiu Ainaro, maibe iha  autor nia viajem kalan ona iha dalan, husu familia iha lisan Berdato Nunumogue-Lau, hodi deskansa kalan ida hafoin dadersan kontinua viajem ba Ainaro hodi tarata kartaun eleitoral, maibe ikus mosu fali situasaun ne’ebe la espera, hodi hakotu Lia nain Lisan Berdato Mau Buti (60) ho nia kaben Ana Orleans, (60) inklui ta kanek Celestino Xavier (19) ikus lori ba iha hospital Ainaro hakotu is, no bei-aon Lusio de Araujo (3) oras ne’e dadaun halao hela tratamentu iha Hospital Referral Maubisse.

Kazu omesidu ne’e akontese iha Aldeia Nunumoge-Lau Suku Nunumoge Postu Administrativu Hatobuilico Munisípiu Ainaro, Segunda-Feira  maisomenus tuku 4:00 dadersan madrugada. Situasaun homesidio refere halo komunidade no vijino iha area Nunumogue-Lau paniku no tauk hodi halai ba mai buka tuir motivu husi akontesimentu refere.

Relasiona ho akontesimentu homesidiu refere, parte PNTL Municipiu Ainaro to’o kedas iha fatin akontesimentu hodi halo investigasaun konaba kronologia husi akontesimentu refere, akompanha mos husi parte servisu protesaun sivíl hodi evakua kanek na’in rua ba iha ospital Ainaro, maibe to’o iha Hospital Ainaro kanek nain rua ne’e ida hakotu is no ida seluk oras ne’e lori ba Hospital Referral Maubisse hodi halo tratamentu.

Depois de akontesimentu homesidio ne’e, parte PNTL Municipiu Ainaro, detein ona suspeitu  ho inisial SR, iha sela policia hodi halo investigasaun.

Suspeitu ho inisial  SR, oho Vitíma nain tolu Mahein Lisan Berdato Maubuti  idade 60 Ho nia kaben Ana Orleans idade 60 no beioan Celestino Xavier idade 19, iha uma Lisan Berdato, daudaun ne’e iha ona sela detensaun PNTL Municipiu Ainaro kumpri oras 72  hodi halo prosesu primeiru interogatóriu iha tribunal Suai.

Ba Radio Komunidade Maubisse Mauloko, Komandante Investigasaun Sarjentu Xefe Armindo do Rosário Araujo informa katak;

“Suspeitu ho inisial SR  idade 22 dadaun ne’e iha ona sela detensaun hodi hein ba prosesu Primeiru  ivestigasaun iha Tribunal Suai no Mutivu husi kazu ne’e iha hela prosesu investigasaun no kona ba suspeitu nebe’e oho vitima nain tolu no labarik ida ho idade tian 3 dadaun ne’e iha ona parte seguransa PNTL nia liman hodi kumpri oras 72 iha sela detensaun, nune’e bele halo prosesu tuir mai,” Informa Comandante Investigasaun Sarjentu Xefe Armindo Do Rosário Araujo.

Entertantu tuir sasin husi matebian nia oan mane Mario Corte-Real haktuir ba Radio Komunidade Maubisse Mauloko katak;

“Kronolojia suspeitu husi Postu Hato-buliko mai iha uma lisan Berdato iha Nunomoge-Lau hodi deskansa nune’e iha dadersam Segunda-Feira hodi ba tarata dokumnetus ou renova fila fali kartaun leitorál, maibé dadersan tuku 04:oo dadersan madrugada nia muda nia hanoin sem razaun hodi halo asaun omesido ne’e”.  Haktuir oan mane Mario Corte-Real

Mario Corte-Real hatutan liu tan katak;

“Akontesimentu ne’e  iha oras mais ou menus 4:00 dadersan madrugada, suspeitu tama ba uma laran, haree ferik ho katuas toba hela no la hatene saida maka nia atu halo ba, iha ne’ebá nia taa uluk Subrinho Celestino no subrinho ne’e  konsege bolu nia maun ho lian makas katak SR taa hau, ami rona ne’e konsege halai sae ba uma,  suspeitu ne’e taka metin odamatan hodi taa mos Apa Maubuti ho Ama Ana homos kiik oan Lucio,”  Hatutan Mario Cortreal oan mane husi maktoba Matebian Mau-Buti ho Ana.

Suspeitu nebe’e oho vitima nain tolu ho labarik ida dadaun ne’e iha ona parte seguransa PNTL Municipiu Ainaro nia liman hodi kumpri 72 oras hafoin submete ba Primeiru Interogatóriu iha tribunal distrital Suai, enkuantu iha terenu polisia rekolha ona evidedensia hanesan katana ne’ebé suspeitu uza hodi  taa sidadaun na’in ha’at no tolu lakon vida, nain ida halao tratamentu intensivo iha Hospital Referral Maubisse. No sasan kroat ne’ebe suspeito uja hodi taa vitima nain haat oras ne’e dadaun PNTL Municipiu Ainaro asegura ona hodi sai núdar evidensia, tamba bazeia ba lei númeru 5/2017/ arma branka, bandu ema kaer sasán kro’at no habadak ema nia vida, Parte seguransa iha responsabilidade hodi foti nune’e sai hanesan evidensia ba investigasaun sira tuir mai.

Relasiona ho akontesimentu iha Nunumogue –Lau ne’ebe rejulta ema nain tolu mate no ida kanek todan ne’ebe oras ne’e dadaun halao hela tratamentu iha Hospital Referral Maubisse, husu ba ita hotu atu matan moris neon nain, basa situasaun sira ne’ebe akontese hodi afeta ema nia vida ita la espera, tan iha ita nia rain afinal sei iha ema hanoin at sira ida rua sei sikat let iha ita nia knua, aldeia, suco, posto no municipiu, diak liu anticipa duke kura, diak liu matan moris ho neon nain duke akontese mak ita hakfodak.

Jornalista Moises Magno

Editor Joaquim Coutinho