Amu Pároco Hatobuilico “Mane Ne’ebé Susesu Bainhira Ajuda Fen ho Oan Sira Halo Servisu Iha Uma Laran”

0
3,439 views

Racom Maubisse (26/10/2022) Hatudu domin ba malu mak importante tebes hodi bele iha moris kaben nian neʼebé metin. Hanesan ita presiza han-hemu beibeik atu iha isin neʼebé forte no diʼak, ita mós presiza kontinua hatudu domin ba malu beibeik atu iha moris kaben nian neʼebé metin. Maski kaben ba tinan barak ona, maibé feen no laʼen sira presiza hatudu ba sira-nia pár katak sira hadomi no hanoin malu tebetebes.

Domin neʼebé loos la hanoin an deʼit. Domin neʼebé loos tau uluk ema seluk nia kontente. Se Ita mak laʼen ida, Ita mós bele halo serbisu ruma atu ajuda Ita-nia feen, hanesan ajuda lori sasán bainhira kompras, loke odamatan ba nia, fase bikan, fase roupa ka teʼin. Feen barak sente katak neʼe laʼós buat baibain deʼit, maibé neʼe hatudu katak Ita hadomi tebes nia.

Ligadu ho Tema importante ne’ebé maka temi dadaun ne’e, Ba Jornalista Radiu Komunidade Maubisse Mau-Loko Amu Pároko Igreja Nosa Senhora da Grasa Hato-Builiku Pe. Francisco Soares Fernandes haklaken katak, komparasaun ba familia ida uluk, hodi hateten familia ida uluk aman ne’e hanesan Liurai, maibe familia ida  ohin tenki sai familia ne’ebé servidór no Servidora iha uma laran.

“Familia ida uluk ne’e sistema familia Patrelinial ne’e familia Liurai aman ne’e hanesan Liurai í feto sira hanesan atan. Maibe familia ideal ida ohin loron nian ne’e ita tenki muda mentalidade familia ida ohin loron ne’e tenki sai familia ida servidora, servidór ne’e katak fen mós hatene tein laen mós hatene tein, kolia kona-ba igualidade Jeneru ne’e fen tein laen mós tein. Fen ho laen tein hamutuk hán hamutuk sai ba servisu  hamutuk, fen sai ba servisu laen iha uma hatene fase ropa, dasa uma laran, fase bikan, rega Ai-funan, hatene hadia jardin ida ne’e familia ideal maka ida ne’e familia ne’ebé la foti-an familia ida ne’ebe tulun malu ne’e ita kolia kona-ba familia karidade no familia ne’ebé solidaridade ne’e katak laen bele halo fen nia servisu, fen bele halo laen nia servisu oan sira bele halo inan aman nia servisu í inan aman bele halo oan sira nia servisu” Hateten Amu Pároko Igreja Nosa Senhora da Grasa Hato-Builiku Pe. Francisco Soares Ferdandes ba Radiu Komunidade Maubisse Mau-Loko Liu husi Via Telefone 26/10/2022.

Bibiatan ba Sarani Paroquia Hato-Builiku ne’e kuntinua afirma liu tan katak, aman ida ne’ebe maka halo ida ne’e sai hanesan aman ne’ebé maka ezemplar, aman ida ne’ebe Ideal no aman ida ne’ebe maka ho fuan inan nian.

“Fase oan nia ropa ne’e aman diak ida aman ezemplar kous oan, fó haris, fó hatais, fohan oan. Se aman ida halo hanesan ne’e aman ne’ebe ideal aman ne’ebé ho fuan inan nian fuan domin nian”  Dehan Bibiatan ba Sarani Hato-Builiku Municipiu Ainaro ne’e 26/10/2022.

Nia Kuntinua hatutan liu tan katak, familia uma laran sei monu ba susar karik aman sira hakarak sai hanesan Patraun iha Uma laran.

“Se aman ida Patraun deit ne’e agora la ideal ona se hanesan ne’e susar bót moris la dún diak tamba o la servisu, o servisu itoan o mai konta lerek o nia servisu itoan mai o baku feto, duni, o trata feto, o minimiza feto, diskrimina feto, ne’e ohin loron ne’e laos ona familia ideal. Tamba agora ne’e ema hotu servisu fen mós servisu laen mós servisu”  Dehan Amu Pároko ne’e Liu husi Via Telefone 26/10/2022.

Maske núne’e Nai Lulik Konsidera  Kultura nafatin sai impedementu no sai dezafiu bót tamba fó valor liu ba mane sira.

“Soke ita nia Kultura ne’e maka dala barak sai dezafiu bót ba vida no familia ideal ida ne’e, sai impedementu tamba mane sira dehan sira ne’e maka iha Power makas sira maka bót, maibe pada dasarnya iha livru Génesis Maromak kria ema feto ne’e husi mane nia knotak /Knosen sorin laos husi mane nia ain ka mane nia ulun hodi mane tebe tuku fali feto konformi nia hakarak” Haklaken Nai Lulik ne’e 26/10/2022.

Antes atu hanahas Nai Lulik ne’e kuntinua husu ba Kabenain sira katak moris iha familia presija atu kompelta malu ho domin.

Maske Kultura nafatin fó nia valor ba iha Mane sira, maibe iha Konstituisaun Repúblika Demokrátika Timor Leste (RDTL) Artigu 17 fó nafatin Garantia katak feto ho mane iha direitu no obrigasaun hanesan iha moris familia, Kultural, Sosial, Ekonimíku, no Polítiku nia laran.

Jornalista                     Moises da Silva Magno

Editór                          Joaquim de Fátima Coutinho

0 0 votes
Article Rating
Subscribe
Notify of
guest
0 Comments
Inline Feedbacks
View all comments