Racom Maubisse (28/10/2022) Sesta Feira Loron 28/10/2022 Asosiasaun Café Timor (ACT) Insera aktividade Festival Kafé ba dala 7 nian iha Postu Administrativu Maubisse Municipiu Ainaro.

Seremonia inseramentu  ne’e halao iha Salaun Paroquial Ingreja Imaculado Coração de Maria Maubisse.

Biban ida ne’e Administrador Municipiu Ainaro Leovigildo Amaral Pereira, hateten lori Komunidade Municipiu Ainaro Nia naran ható bemvindu ba Embaizador Australia, Embaizador Nova Zelandia, Gabinete Prezidensia Repúblika, no reprejentate husi Membru Governu  ne’ebé marka sira nia Presenja iha Seremonia  ne’e iha Maubisse Municipiu Ainaro.

“Lori Komunidade Municipiu Ainaro Ható bemvindu ba Eselensia sira hotu ne’ebé ohin mai partisipa iha Festival Kafé ida ne’e atu hatudu katak ita nia Agrikultór sira iha vontade tebes atu servisu makás hodi hatudu ba Mundu katak, Kafé Timor bele sai produtu Nasional hodi hasa’e nia kualidade no produsaun diak liu tan iha Rai laran. Tamba ne’e agradese ba Presenja sira hotu katak ita bót sira mai iha Postu ida ne’e atu motiva diak liu tan ami nia agrikultóres sira liu-liu iha parte Kafé nian hanesan ita nia Duadores sira ne’ebé fó sira nia apoiu makás hodi motiva ita nia Agrikultór sira hodi hasa’e produsaun Kafé ho diak liiu tan” Dehan Administrador Municipiu Ainaro iha Maubisse 28/10/2022.

Nia Kuntinua hatutan liu tan katak Nafatin lori Komunidade Municipiu Ainaro nia naran ható agradesementu ba Oitavu Governu Konnstitusional ne’ebé tau atensaun másimu ba produsaun Kafé. Kolia kona-ba Kualidade kafe ne’ebe diak, Autoridade másimu Municipiu Ainaro husu atu kria nafatin formasaun ba Komunidade sira oinsa atu kuida kafe ho diak tuir sistema modernu nian. Husi Sorin seluk mos Leovigildo ható mós ninia agradesementu ba Duador sira ne’ebé fó sira nia apoiu ba Hadia no hasa’e Kualidade Kafé iha Timor Leste espesialmente Postu Administrativu Maubisse Municipiu Ainaro.

“Kafé ne’ebé iha nia kualidade diak ita presija iha formasaun ba ita nia Agrikultór sira, tamba ne’e maka aproveita oportunidade ida ne’e agradese ba hot-hotu bele fó apoiu másimu ba ita nia Komunidade sira liu-liu iha Postu ida ne’e, tamba ne’e maka hau agradese liu-liu ba Doador sira ne’ebé fó apoiu másimu ba Agrikultóres Kafé, tamba ne’e ohin ita hotu nia hamutuk iha ne’e atu fó sai katak Kafé Municipiu Ainaro nian mós iha Kualidade”

 Iha fatin hanesan Embaizador Australia iha Timor Leste Rekoiñese Kualidade Kafé Timor diak no Furak tebes.Tamba ne’e reprejentante Governu Australia iha Timor Leste ne’e husu ba Komunidade Produtores Kafé  Atu Servisu makás no hasa’e kuantidade Kafé hodi hatan ba iha Ejisensia merkadu Internasional.

“Maske Timor Leste nia Industria Kafé kuntinua lao ba oin maibe iha mós ezisensia ne’ebe bót husi liur ne’ebá, Atu núne’e Timor Leste Presija servisu makás liu tan atu resposta ba ezisensia sira ne’e” Hateten Embaizadór Australia Wainhira partisipa iha Seremonia Inseramentu Festival Kafé iha Maubisse Municipiu Ainaro 28/10/2022.

Alende ida ne’e Tuir Embaizadór Nova Zelandia iha Timor Leste Mr. Philip Hewitt hateten, Governu Nova Zelandia nafatin orgullu Apoiu Governu Timor Leste, no servisu hamutuk ida ne’e lao durante tinan 10 ona, hodi fó sira nia tulun ba dezemvolve Industria Kafé iha Timor Leste.

“Nova Zelandia orgullu tebes, iha Tinan 10 nia laran ona no espera sei fó tulun nafatin ba Industria Kafé. Apoiu ne’ebé Governu Nova Zelandia ba seitór ida ne’e liu husi Kóperativa Kafé Timor ne’ebe mós kobre iha mós iha area Maubisse” Hateten Mr.  Philip Iha Sermonia Festival Kafé iha Postu Administrativu Maubisse Municipiu Ainaro 28/10/2022.

Nova Zelandia nia Apoiu ba Festival Kafe ida ne’e liu husi Servisu hamutuk ne’ebe maka halao ho The Asia Fundation.

Maske núne’e Reprejentante Governu Nova Zelandia ne’e, Rekuiñese katak kondisaun estrada maka susar tebes ba Komunidade sira atu trasporta  produtu Kafé no produtus sira seluk tan asesu ho lais ba Merkadu. Tamba ne’e atu resolve problema ne’e presija tebes husi partes hotu nia kóperasaun no servisu hamutuk.

“Ita mós hasoru obstaklu balun hanesan asesu dalan ba Kafé Kultor Sira seidauk diak hotu tamba ne’e bele afeita mós ba trasportasaun no redus lukru husi Agrikultór sira. Oinsa maka Governu, no Seitór privadu sira atu servisu hamutuk atu mellora merkaduri no identidade Kaf’e Timor Leste  liga ba Timor Leste nia úniku balun hanesan Buanila no Turizmu, Tamba ne’e oinsa ita nia servisu hamutuk hodi infeste ho matenek hodi hadia kualidade Kafé Timor Leste” Hateten Embaizadór Nova Zelandia ne’e 28/10/2022.

Fatin hanesan Governu liu husi Direktur Nasional Plantas Industria Kafé, Doenato Salsinha Menezes husu Komunidade Agrikultor Kafe iha Maubisse atu kuntinua hadomi Kafé no Konsidera Kafé sai hanesan Idetidade no Kultura Timor Nian. No ba Oras ne’e dadaun Governu Tau atensaun makás ba Plantasaun Kafé.

“Hadomi Kafé, Kafé hanesan ita nia Kultura ita haforsa Kafé ho ita nia Kultura rasik. Ohin loron ita halo iha Maubisse maka hanesan reprejenta kualidade Kafé ne’ebé agora ita nia maluk ajenjia sira promove” Dehan Direktur Nasional ne’e iha Maubisse 28/10/2022 

Ho Momentu hanesan Reprejentante Prezidente da Repúblika, husi Direktur Jeral Gabinete Prezidensia Repúblika Domingos Amaral Hateten.

“Mai hamrík iha ne’e Reprejenta Prezidente da Repúblika kolia kona-ba Kafé hanesan Sua Exelensia Prezidente da Repúblika inisiattiva ninia kompremisiu atu dezemvolve hamutuk ho Governu dezemvolve Kafé Timor tamba ita nia OJE mai liu pronsipalmente huai ita nia Fundu Minarai, entaun ita nia Estadu Tenki deversifika ita nia ekonomia liu mós husi ida maka dezemvolve ita nia Kafé Timor hanesan mós ita nia Kultura no identidade” Dehan Dj Husi Gabinete Prezidensia Repúblika ne’e Liu husi diskrsu ba enseramentu Festival Kafé Timor iha Maubisse 28/10/2022

Nia Kuntinua husu ba Komunidade Kafé Kultór atu kuntinua Kuida no Kuda Kafé inklui aumenta produtividade Kafé makas liu tan.

Hafoin de Insera Festival Kafé Timor ba Radiu Komunidade Maubisse Mau-Loko Liu husi Intervista Vise Prezidente Asosiasaun Café Timor (ACT) Afonso de Olivera Afirma, aktividade ida ne’e halao ba dala 7 ona, liu husi ida hodi kria relasaun amizade liu tan entre Komunidade Agrikultor Kafé ne’ebe maka mai husi Municipiu la hanesan, Inkliu tékniku sira ne’ebe maka mai husi Rai liur.

“Festival Kafé ne’e ba dala 7 objetivu maka atu lori produtores Kafé Kultor mai hamutuk para bele kolia ba malu, laos deit kolia kona-ba kualidade tamba sira bele troka esperensia. Importante ida mós lori ita nia bainaka sira mai husi Rai Liur hamutuk ho ita ne’e hodi estabelese relasaun amizade ho sira” Afirma Vise Prezidente ACT 28/10/2022 

Entertantu Mebru husi Asosiasaun Café Timor ne’ebe Rejistu ona iha Asosiasaun hamutuk 50, no sira ne’ebe maka seidauk rejistu iha Asosiasaun Café Timor iha teritóriu Nasional Kuaje Rihun Tolu nolu (30.000)

No Asosiasaun Café Timor Realija Eventu ida ne’e Hatan Apoiu Husi Governu Austalia, Japaun Liu husi JICA, Governu Nova Zelandia, no mós Organizasaun ne’ebé ejisti iha Rai laran.

Seremonia Festival ida ne’e iha Maubisse lao ho diak to remata, intrega mós Premeiu ba Manan nain ne’ebe liu iha teste Kualidade Kafé ne’ebé maka diak.

Jornalista                     Moises da Silva Magno

Editór                          Joaquim de Fátima Coutinho