Racom Maubisse,  15/10/2022, Kada Knua ida, lidun ida, rai ida no nasaun ida sempre iha nia identidade rasik, iha Timor Leste, kultura mak sai hanesan identidade uniku, antes no depois de portugues tama iha rai Timor hodi ukun Timor lorosa’e durante 450 anus, depois de portugues sai no Indonesia invade fila fali durante 24 anus, no Timor Leste restaura hikas nia independencia iha 20 de Maiu 2022, liu husi referendum kultura timor nafatin eziste nafatin to’o ohin loron.

Serake ho mundu globalizasaun ohin loron nian, bele halo mudansa ba kultura? Resposta simples katak bele akontese, tamba Timor-Leste adopta Sistema demokrasia liberal ne’ebe fo dalan ba nasaun ne’ebe deit, bele tamba livre iha Timor, perante kumpri rekezitus sira ne’ebe mak Timor Leste adopta hela.

Ba oras ne’e dadaun, kultura sei iha relasaun metin ho sosidade timorense. Hanesan ita akompanha antes no depois de ukun rasik-an Timor Leste iha lalaok aktividades kultura sira hanesan: hari uma lulik, halao barlaki (fetosan-umane), kore metan, tara bandu, se matebian, sau batar, tun be, e mos kultura ida ne’e ita akompanha hensan iha Maubisse igreja no sarani sira kada tinan selebra feta fahi ulun, nomos aktividades kultural selukne’ebe komunidade selebra hodi fo respeita ba ai hun, be matan no atributu kulturais sira iha kada uma lisan,  tamba ne’e it abele dehan katak, ba oras ne’e dadaun kultura iha Timor sei metin iha komunidade nia let.

Pergunta ida seluk mosu tan mak ne’e, serake ita persija duni hametin no haburas kultura, iha sociedade, tamba kultura mak  ita nia identidade nebe uniku ne’ebe mai keas husi tempu uluk liu, antes relijiaun katolika tama iha timor. Aktividade kultura sira ne’ebe mensiona hanesan kustume ida ne’ebe beiala sira husi hela no tuir mai jerasaun sira hatutan no kontinua ho nia objektivu atu kaer metin identidade kultura iha kada uma lisan ida idak e mos uma kain ida-idak nune’e hametin relasaun entre familia liu husi feto san umane.

Lia fuan kultura tuir lian Melayu haktuir katak adat ou kebudayaan, tamba ne’e hanesan timor oan precisa kaer metin no promove e habelar nune’e labele halakon ita nia identidade. Maibe iha parte seluk kultura mos lori impaktu negativu ba vida moris iha kada pessoa, grupo, komunidade nomos sociedade.  Exemplu kokreta sira ne’ebe lao hela iha komunidade ka sociedade nia let mak hanesn, ba ema sira nebe hili moris liu husi area bisnis ka negosio, kultura sai mos hanesan faktores ida nebe’e bele hamate sira nia kapital  no hamonu negosio. Iha aktividade negosio, faktores importante mak kapital nebe’e kompostu husi: osan, ema, material, rai, nomos tempu, tamba se negosiante sira fo tempu barak ba aktividade kulturais mak sei fo impaktu ba sira nia negosio ou ho lia fuan seluk katak se negosiante sira participa maksimu iha aktividades kulturais mak negosio se monu ka mate.

Maibe hanesan Timor Oan puru, se la fo biban ba aktividades kulturis sira maka tuir kultura ne’ebe ita adopta sei fo mos impaktu ba negosio ne’ebe ita halao, Exemplu konkreta mak hanesan maluk sira husi lian kemak, kada tinan sira halo aktividades kulturais hou hotu tenke ba lakon dala ida maibe hetan fali liu ida ne’e, katak durante halao aktividades negosio, sira fiar ba lisan no kultura ne’ebe sira mai, tamba tuir fiar iha Timor katak husu licensa no matak malirin husi kada lisan, hodi sai ba buka moris ka fila liman ikus sira tenke ba hato’o agradecimentu, liu husi serimonia kultural ne’ebe mak lia nain sira planu iha kada uma kain. Programa henesan mos akontese iha ema mambae, fataluku no makasae, iha sorin seluk ema bunak no fehan sira ladun adopta kultura ne’ebe makas hanesan ema kemak, mambae, fataluku no makasae sira, e bele dehan ema bunak no fehan sira nia kultura tau hamutuk sasan ita uja hotu, hotu ona, importante mak kaer metin nafatin kultura liu husi respeita malun hodi hadia moris kada familia liu husi uma kain no lisan ne’ebe ita horik ba.

Lia fuan Kultura, iha antropolojia katak, banate/dalan husi klalaok (tingkah laku/behaviour) no hanoin (thinking) nebe ema moris iha grupu sosial ida aprende, kria no fahe ba malu. Ho kultura ita bele haree diferensia entre grupu humanu ida ho seluk. Kultura mos haketak ita ema ho animal. Kultura ema nian ida inklui sira nia fiar, sira nia regulamentu ba hahalok, lingua, ritual, arte, teknolojia, hatais, relijiaun, ho sistema ekonomia no politika.

Ita hare iha ciensia Antropolojia dehan, baibain uza termu kultura hodi refere ba sosiadade ka grupu ida nebe barak ka ema hotu nebe moris no hanoin ho dalan nebe hanesan. Nune’e mos, grupu ka ema sira nebe iha kultura hanesan, partikularmente, iha regulamentu kona ba moris ne’ebe hanesan no iha organizasaun sosial basiku nebe hanesan sei forma sosiadade. Matenek nain sira sempre dehan kultura mai ho ninia lalaok ida ne’ebe uniku, mak ho kultura iha paz dame no unidade iha sociedade. Tamba ne’e iha timor leste uma lulik mak hanesan simbol aas liu ba Kultura Timor nian. Uma Lulik hanesan sentru kultura ba ita Timor oan.

Pergunta mai ita hanesan Timor oan saida mak Uma lulik, tambasa mak tenke iha uma lulik ka uma lisan, tuir ita Timor oan sira nia hare? Uma Lulik ka Uma Lisan, hanesan uma ida nebe konsidera sagradu. Uma Lulik sira ne’ebe eziste iha Timor mai kedas husi beiala sira nia tempu, antes kolonialista portugues tama iha timor durante 450 anus no invazor Indonesia invade Timor durante 24 anus. Signifika katak, uma lisan ka kultura no tradisaun ne’ebe ita adopa dadaun iha Timor mai kedas husi beiala sira nia tempu. Uma Lulik konsidera hanesan igreja tradisional, nomos boska ne’ebe hada ho fatuk ita konsidera hanesan altar tradisional hodi koalia ho Maromak, Ezemplu hamulak sira husi lia nain ema mambae sira babain iha kada uma lisan tur iha altar tradisionla iha uma lisan laran sempre murmura no it abele nota ho lia fuan mamabae dehan “ AU HUHU Nor Oen, Lulin Nor Kesan, Au Hatu Nor Au Raen, Au Ina Nor Au Ama, Ne Beil Tulun Ma, Nebeil Forca Ma” husi hamulak lia nain ka kuku sira, ne’ebe ikus taka ho fo bua malus simbolu matak malirin ba oan no bei oan sira.

Hanesan Timor Oan sempre hatene no konhece katak iha kada uma lisan sempre ari atributu kultural sira iha kada uma lisan mak hanesan, surik ka katana lulik, tais lulik, lensu lulik, livru lulik, we lulik, fatuk lulik, ai lulik, mortel lulik, kaibauk lulik, belak lulik, rota lulik, atributu kultural sira ne’e mak antes no depois e to’o agora ita sei konsidera lulik no sagradu. Signifika katak, atributu sira ne’ebe ita konsidera lulik sei rai iha uma lulik ka uma lisan nia laran, nune’e Uma Lulik ida-idak iha valor ne’ebe as tebes ba Timor oan sira nia moris, nafatin no ba nafatin. Uma Lulik ka uma lisan sira, iha relasaun entre ema individual, familia, husi jerasaun ba jerasaun sira. Ho Uma Lulik no liu husiuma lisan ka uma kultura, haraik ba uma oan sira no jerasaun sia kria fiar malu, respeitu malu, hanai malu no kuinhese malu diak liu tan, katak ho kultura, iha kultura no liu husi kultura kria unidade no paz ne’ebe hanaran unidade nasional liu husi kultura.

Tamba ne’e hanesan Timor Oan, se laiha kultura liu husi uma lisan ka uma lulik, mak konsidera ita laiha identidade, se ita la iha identidade, ita laos ema Timor, se ita la iha kultura mak ita ema rai seluk. La signifika se ita la iha kultura ita laiha abut no namlele, no se ita la iha kultura ita sei la fiar malu no la respeitu malu, maibe fiar malu no respeita malu ne’e depende ba konsiensia ema ida idak nian. Mais konciente katak hakarak lakohi hanesan timor oan tenke iha kultura no lisan, se ita laiha kultura no lisan mak tuir fiar kultura nian katak ita nia moris sei lafeliz no babain lia nain sira uja lia fuan kultura nian dehan “laiha hun no la iha rohan” maske nune’e mai ita fiar no respeita nafatin ita nia kultura iha kada lidun, knua nune’e hatudu ba ema seluk katak Timor iha nia identidade mak kultura no kultura mak identidade Timor Oan sira nian.

Tamba ne’e uja kultura hodi promove paz, dame no unidade iha knua, lidun, familia no sociedade, hodi kontribui ba ita nia rain nomos kontribui ba dezemvolvimentu nasional, labele uja kultura hodi taka dalan ba malu, hamate malun, labele uja kultura hodi impede malu, labele uja kultura hodi ataka malun, labele uja kultura hodi halo korupsaun, labele uja kultura hodi husu sasan ne’ebe tuir ita nia hakarak, no husu sasan karik husu tuir dalan kultura nian, hodi hametin unidade entre feto san ho umane nomos maun alin sira iha kada uma kain no uma lisan iha sociedade Timorense.

Hakerek Nain; Joaquim de Fatima Coutinho, Jestor Radio Komunidade Maubisse Mauloko

Husu imput husi maluk le’e nain sira atu kompleta, Tamba artigu ne’e hakerek nain hakerek tuir konhecimentu ne’ebe iha.