Racom Maubisse (06/07/2022) Rai ne’ebé maka oferese husi Komunidade Aldeia Hato-Luli no ldeia Kanurema ne’e hetan observasun direita husi Sekretariu Estadu Formasaun Profesional no Empregu Alarico de Rosário, Direktur Nasional ba Formasaun Profesional hamutuk ho Direktur SEFOPE Municipiu Ainaro iha Area Balija Entre Suku Horaiquic ho Suku Maubisse Villa Municipiu Ainaro.
Ba Radiu Komunidade Maubisse Mau-Loko Xefe Suku Maubisse Villa Wilson Nivio Mendonça hateten;
“Vizita Sua Eselensia Sekretáriu Estadu SEFOPE mai iha Maubisse liu-liu iha Aldeia Hato-Luli no Aldeia Canurema, atu ba observa Rai ida ne’ebé Komunidade sira rasik hamutuk ho Suku ho nain ba Rai sira hakarak entrega ba parte Estadu para hodi bele halo Dezemvolvementu ba fatin Sentru de Formasaun ida ne’ebe sei sai hanesan Sentru atu kapasita Joven sira ba aban bairua servisu iha area Hospitalidade, Agrikultura, no mos iha Karpintaria” Dehan Autoridade Suku Maubisse Villa 06/07/2022.
Rai refere Komunidade entrega ho voluntariumente ba Suku hodi Kontinua entrega ba Estadu hodi Kria Dezemvolvementu iha Rai Refere.
“Ita buka Rai Estadu laiha maibe Komunidade sira ho voluntariumente entrega Rai ba Suku no entrega ba Estadu atu bele halo Sentru Formasaun, ita bele dehan katak Rai ne’ebe maka Komunidade sira entrega ne’e meia hektares ida hanesan ne’e. Rai ida ne’e partense ba iha Aldeia Hato-Luli, maibe nain ba Rai refere mai husi Aldeia rua maka hanesan Aldeia Hato-Luli no Aldeia Canurema rasik” Dehan Wilson Xefe Suku Maubisse Villa 06/07/2022.
Relasiona ho ida ne’e Direktur Nasional ba Formasaun Profesional husi Sekretaria Estadu Formasaun Profesional no Empregu Mateus do Santos Talo hateten, Agradese ba Inisiativa Komunidade Autoridade Lokal Postu Administrativu Maubisse Municipiu Ainaro.
“Agradese liu-liu ba Autoridade sira iha ne’e Postu Maubisse liu-liu ba Suku Maubisse Villa ho ita nia Lia Nain Juventude sira Rai Nain sira iha ne’e, ne’ebe maka konsege túr hamutuk ona hodi oferese Rai rohan balun iha parte Aldeia Kanurema ho Aldeia Hato-Luli” Lian agradesementu husi Direktur Nasional SEFOPE ba Komunidade no Autoridade Lokal Postu Maubisse 06/07/2022.
Nia Hatutan Rai ne’ebe maka oferese ona husi Komunidade sira ba Parte Governo Liu Husi Sekretaria Estadu Formasaun Profesional no Empregu ne’e atu halo Konstrusaun ba Sentru Formasaun iha Rai refere.
“Ami nia objetivu Prinsipal maka ita atu halo konstrusaun ba Sentru Formasaun iha area Hospitalidade, Turizmu,Agrikultura no area Konstrusaun Jeral ninian. Liga ba Polítika Formasaun Profesional rasik ita iha planu ne’ebe maka obriga nia asoens ba futuru katak iha Municipius hotu-hotu tenki iha Sentru Formasaun Akreditadu entaun ita konsidera katak, Governu liu-liu parte SEFOPE konsidera katak Municipiu Ainaro Seidauk iha Sentru Formasaun Akreditadu ne’ebe ejisti iha ne’e atu fornese formasaun ba ita nia Joven sira iha Municipiu Ainaro, entau agradese ba Autoridade sira iha ne’e, Rai Nain sira ne’ebe maka oferese ona sira nia Rai ba iha SEFOPE atu halo Konstrusaun Servisu hamutuk ho Sentru Formasaun Tibar maka sei implementa ka Konstroi ita nia Sentru Formasaun ida ne’e” Dehan Direktur Nasional ne’e ba Jornalista RKMM 06/07/2022.
Tuir Planu Sentru Formasaun ne’e sei halao lansamentu ba Fatuk dahuluk iha fulan Agostu Tinan ne’e husi Sekretariu Estadu Formasaun Profesional no Empregu iha Postu Administrativu Maubisse Municipiu Ainaro.
Jornalista Moises da Silva Magno
Editór Joaquim de Fátima Coutinho
