Racom Maubisse, 01/06/2022, Maria Beatriz Husi Plan Internasional, Husu Parte Hotu Tau Importante ba 01 de Junho hanesan Loron Internasional ba labarik tamba ne’e mak ohin iha Suco Maununu ita hamutuk ho Autoridade sira hodi selebra loron mundial ba labarik sira.
Ba radio Komunidade Maubisse Mauloko, Responsabel programa labarik Aileu ho Ainaro Maria Beatriz husi Plan Internasional hateten katak;
“Objektivo husi selebrasaun loron mundial ba labarik nian katak, primeiro oinsa ita atu bele fo hanoin ba parte hotu, inan aman, komunidade, lideransa komunitaria sira, e parte hotu hanesan responsavel ba labarik atu sira bele hanoin katak dia 1 de Junho ne’e loron munidial ba labarik no sira bele tau inportansia ba loron ida ne’e iha ita nia komunidade no iha ita nia uma laran, iha ita nia munisipio, no ita mos tenke tau inportansia loron mundial ba labarik inklui oinsa sira hetene direitu fundamental ba labarik iha parte hat mak hanesan; direitu ba moris, direitu ba protesaun, direitu ba partisipasaun no mos ba dezemvolvimentu, iha loron ida ne’e ita atu halo kontente haksolok halimar ho ita nia oan sira ba selebrasaun loron ida nee, sira mos bele sente katak ohin loron sira nia loron e sira bele kontente atu bele partesipa iha aktividade saida deit”.
Iha Fatin hanesan Chefe do Suco Maununu Ainaro Valente Ramos Bianco ba radio Komunidade Maubisse Mauloko, hateten katak;
“Hanesan autoridade komunitariu sente solok ho programa Plan Internasional nian ne’ebe ohin selebra hamutuk ho ita iha ne’e konaba loron mundial ba labarik e durante ne’e Plan Internasional ajuda tebes buat lubuk ida iha Suco Maununu, tamba ne’e hanesan autoridade komunitariu rekomenda ba Plan Internasional atu konyinua programa labarik nian nomos halo kooperasaun ho parte hotu”
Tuir Administrador Interinu Municipiu Ainaro Jose de Araujo katak;
“Hau nia hanoinPlan ninia prezensa iha Ainaro kuaze tinan barak ona konsege halo buat barak dada be mos, rehabilita eskola no tan sira seluk ba iha komunidade sira e ohin eventu ida ke inportante teb-tebes sira organiza iha eventu ida nebe inportante liu-liu loron mundial ba labarik ninian nebe ohin halao dadauk iha Suco Maununu”.
Tamba ne’e Administrador Interino ne’e rekomendasaun ba Plan tanba Plan halo buat diak lubuk iha Munisipio Ainaro, husu Plan Internasional kontinua halo, e ami hanesan autoridade pronto atu kopera ho sira hodi halo diak liu tan ba future, ligado ho loron labarik sira nian, ida ne’e laos responsabilidade Plan nian mesak maibe nee responsabilidade inan aman entidades hotu, oinsa mak atu tau kestaun ba labarik sira nian nebe mak inportante, oinsa atu proteje no promove labarik sira liu liu iha parte edukasaun saude no sira seluk tan atu nune envolve labarik sira ne’e ba future ida nebe diak liu tan.
Jornalista Carlos Borges
Editor Joaquim Coutinho
